स्पेस समाचार 
काठमाडौं– नेकपा एमालेका सांसद अच्युतप्रसाद मैनालीले मधेस प्रदेशमा हत्याका घटनाहरू बढेको भन्दै नियन्त्रणका लागि सरकारको ध्यानाकर्षण गराएका छन् ।
आइतबारको प्रतिनिधि सभा बैठकमा बोल्दै उनले यस्तो बताएका हुन् । उनले मधेस प्रदेशका विभिन्न जिल्लाहरूमा दिनदहाडै हत्याका शृङ्खलाहरू बढ्दै गएको भन्दै सरकारले आवश्यक ध्यान दिनुपर्ने बताए । उनले भारतबाट खुला सीमाका कारण नेपालमा आइ हत्या गर्ने, सुटरहरु नेपाल प्रवेश गर्ने र हत्या गर्ने हुनाले हत्याका घटनामा उल्लेख्य वृद्धि भएको भन्दै रोकथामका लागि आवश्यक पहल गर्न आग्रह गरे । उनले अपराधीलाई अविलम्ब नियन्त्रण गरी कानुनको दायरामा ल्याउन आवश्यक रहेको बताए ।
उनले भने, ‘बारा जिल्लामा यो चौथो घटना हो । एक वर्षको अवधिमा गत असोजमा पनि कलैया सदरमुकामको चोकमा दिन दहाडै एक निजी स्कुलका प्रिन्सिपलमाथि आक्रमण भयो । उहाँको हत्या भयो । भदौ महिनामा पनि भारतका व्यक्तिलाई नेपालमा ल्याएर हत्या गरियो । यो हत्याको शृङ्खला बढ्दै गइरहेको छ । दुर्भाग्यको कुरा सुटर भारतबाट आएर नेपालमा आउने, खुला सीमा, हातहतियारहरूको ओसारपसारले गर्दा मधेस खास गरी सीमा क्षेत्रका बासिन्दा असुरक्षित र त्रसित भएका छन् । मधेसमा एक दशकअघि जुन राजनीतिक आवरणमा हत्या र हिंसाका शृङ्खला भएको थियो, धेरै मानिसहरू विस्थापित हुनुप¥यो । त्यो पीडालाई बिर्सिएर मधेस सङ्लिँदै गइरहेको अवस्थामा हत्या जुन हिसाबले बढ्दो रूपमा छ । यसको अविलम्ब नियन्त्रण, अपराधीलाई कानुनको दायरामा ल्याउनको लागि र सीमा पारीको प्रशासनसँग पनि समन्वय गरेर प्रशासनले सक्रियता अपनाओस् । सम्बन्धित निकायमा आवश्यक निर्देशनको लागि सम्माननीय सभामुखमार्फत अनुरोध गर्दछु ।’
उनले सीमा पारीको प्रशासनसँग समन्वय गरेर प्रशासनले सक्रियता अपनाउन आवश्यक रहेको बताए ।
