स्पेस समाचार कवि नरेन्द्र कुमार नगरकोटी‘सन्नाटाको लय’ लिएर आएका छन् । उनको पहिलो कवितासंग्रह ‘सन्नाटाको लय’ शुक्रबार सार्वजनिक भएको छ ।
शुक्रवार अनामनगरस्थित मण्डला थियटरमा कविताका विज्ञ र पारखीहरुका बीच ‘सन्नाटाको लय’ सार्वजनिक भएको हो । कवि विप्लव प्रतीक, आख्यानकार विजय सापकोटा र समालोचक प्रा. ज्ञानु अधिकारीले संग्रहको संयुक्तरुपमा लोकार्पण गरेका हुन्।
उक्त अवसरमा बोल्दै प्रा ज्ञानु अधिकारीले कविता संग्रहबारे बुझ्न पुस्तकको नामै काफी भएको बताइन । ‘सन्नाटाको लय’ले आफ्नो मन मस्तिष्क हल्लाइदिएको खुलासा गर्दै उनले कवि नगरकोटीका काव्यिक बिम्बहरुको तारिफ गरेकी थिइन् । अधिकारीले संग्रहमा संग्रहित २८ कविता सबै शसक्त रहेको र कविले सरल शब्द मार्फत नै बिशाल सामाजिक क्रान्ति ओकलेको अर्थ्याएकी थिइन् ।
शिक्षण पेशामा दशकौ काम गरी हाल बाल उदय मासिक पत्रिकाका प्रकाशक तथा सम्पादक समेत रहेका नगरकोटीले कविता यात्रा मार्फत अप्ठ्यारो बाटो रोजेको भन्दै आख्यानकार विजय सापकोटाले नगरकोटीसँग करिब २ दशक अघिदेखिको सम्बन्ध र सहयात्राबारे स्मरण गरेका थिए । शिक्षा र साहित्यको क्षेत्रमा पाउने भन्दा गुमाउने कुरा धेरै भएको भन्दै सापकोटाले कविता लेख्नेहरुको भीडमा नगरकोटीले पहिलो संग्रह बाटै आफूलाई अब्बल सावित गरेको जिकिर गरे । उनले नगरकोटीको लेखन शैलीबाट आफू सधै प्रभावित रहेको समेत स्मरण गरेका थिए ।
कार्यक्रममा कवि विप्लव प्रतीकले कविताको ६ लाइनले सयौ लाइनको भाव बोक्न सक्ने भन्दै कविता साहित्यको ससक्त विधा भएको र नरेन्द्र त्यसको अझ सशक्त सर्जक भएको बताए । उनले नगरकोटी जस्ता कविकै कारण कविताको ओझ बढ्ने र गरीमा कायम रहनेमा जोड दिंदै काव्यिक निरन्तरताका लागि उत्साहित गरेका थिए ।
कार्यक्रममा कवि नगरकोटीले पहिलो प्रसव पिडा पश्चात प्राप्त ‘सन्नाटाको लय’ ले आफूलाई आनन्दित गराएको र यसको साझी बस्न आएका काव्यिक मनहरुप्रति अनुगृहित रहेको भावना व्यक्त गरेका थिए ।
उक्त अवसरमा कवि नगरकोटीले कविता संग्रहमा संग्रहित कविताहरु मध्ये ‘सन्नाटाको लय,’ ‘ढुकढुकीको आवाज’ र ‘मार्च ८ मा बाको सम्झना’ बाचन गरेर सुनाएका थिए ।
कविता संग्रह ‘सन्नाटाको लय’ लाई शाब्दिक बुकले प्रकाशनमा ल्याएको हो। पुस्तकको मूल्य १ सय ९९ रुपैयाँ रहेको छ।
