स्पेस समाचार 
काठमाडौं– त्रिभुवन अन्तर्राष्ट्रिय विमानस्थलबाट एक वर्षमा करिब साढे ४५ लाख यात्रुले आवतजावत गरेको तथ्यांक सार्वजनिक भएको छ ।
नागरिक उड्डयन कार्यालयका अनुसार त्रिभुवन अन्तर्राष्ट्रिय विमानस्थलबाट सन् २०२३ मा अहिलेसम्मकै धेरै ४५ लाख ४१ हजार १३७ जनाले आवतजावत गरेका हुन् । यो संख्या सन् २०२२ को तुलनामा ३० दशमलव १८ प्रतिशतले बढी हो ।
कोरोना महामारीको समयअघि सन् २०१८ मा भन्दा ४ दशमलव ५ प्रतिशतले बढी रहेको कार्यालयले सार्वजनिक गरेको तथ्यांकमा उल्लेख छ । सन् २०२३ को जनवरी १ देखि डिसेम्बर ३१ सम्म त्रिभुवन विमानस्थलमा अन्तर्राष्ट्रिय उडान तथा अवतरण संख्या ३१ हजार ४ सय ६० रहेको छ ।
यो अवधिमा नेपालबाट २४ लाख २० हजार ७ सय ८७ जना विदेश गएका छन् भने २१ लाख २० हजार ३ सय ५० जना नेपाल भित्रिएका छन् । कार्गो आगमन भने सन् २०२२ भन्दा १३ दशमलव ९८ प्रतिशतले कमी आएको छ । अन्तर्राष्ट्रिय यात्रुको आवतजावत बढे पनि आन्तरिक आवागमन भने घटेको छ । सन् २०२३ मा त्रिभुवन विमानस्थल प्रयोग गरेर ४१ लाख ५० हजार ३ सय २६ जनाले आवतजावत गरेका छन् ।
