![](https://i0.wp.com/spacesamachar.com/wp-content/uploads/2024/05/Chatur-bahadur-chand.webp?fit=1024%2C768&ssl=1)
काठमाडौं– नेपाल क्रिकेट सङ्घ क्यानका अध्यक्ष चतुर बहादुर चन्दले सन्दीप लामिछानेलाई भिसा आवेदन दिनुअघि नै आइसिसी टी–२० विश्वकप खेल्ने टोलीमा समावेश गरिएको स्पष्टीकरण दिएका छन् ।
दुई पटक आवेदन दिँदा पनि नेपालस्थित अमेरिकी दूतावासले सन्दीपलाई भिसा नदिएपछि क्यानले उनलाई टोलीमै राखेको थिएन भनेर भ्रम फैलाइएको भन्दै अध्यक्ष चन्दले शुक्रवार सामाजिक सञ्जालमार्फत त्यसको खण्डन गरेका हुन् । नेपाली टोलीमा रहेका १४ जनाको नाम गोप्य राखिएको र १५औँ खेलाडीका रूपमा सन्दीपको नाम समावेश गरिएको जिकिर उनले गरेका छन् ।
तर सन्दीपले भिसा नपाएको खण्डमा पहिलेकै १५ जनालाई निरन्तरता दिने गरी आइसिसीले नेपालका लागि मात्र विशेष सुविधा दिएको र सोही आधारमा सन्दीप अमेरिका जान पाएको अवस्थामा प्रतिस्थापन हुने खेलाडीको नाम गोप्य राखिएको दाबी अध्यक्ष चन्दले गरेका छन् । हाल विश्वकप स्वक्वाड यूएसएमा रहेका १५ जनामध्ये सम्भावित प्रतिस्थापन हुने खेलाडीको मनोबल कमजोर हुन नदिन टिम म्यानेजमेन्टले परिपक्व निर्णय गरेको उनको भनाइ छ ।