स्पेस समाचार 
बेलबारी । बेलबारी अन्तर्राष्ट्रिय आमन्त्रण गोल्डकपको उद्घाटन खेलमा डाँगीहाट युथ क्लब विजयी भएको छ । डाँगीहाट युथ क्लबले भोजपुर जिल्ला फुटबल सङ्घलाई १–० गोलअन्तरले पराजित गरेको हो ।
मोरङको लक्ष्मीमार्गस्थित लक्ष्मी खेल मैदानमा आज भएको खेलमा दुवै टोलीले पहिलो हाफ गोलरहित बराबरी खेलेका थिए । मध्यान्तरपछिको खेलमा डाँगीहाटले निर्णायक गोल गरेको थियो । उसका लागि खेलको ६८ औँ मिनेटमा निशान लिम्बूले गोल गरेका थिए । उनले अशिम राईको पासमा गोल गरेका थिए ।
यसअघि उक्त प्रतियागिताको उद्घाटन बेलबारी नगरपालिकाका प्रमुख दिलप्रसाद राईले एक भब्य समारोहबीच गरेका थिए । डाँगीहाट युथ क्लवको आयोजनामा सुरु भएको प्रतियोगितामा चर्च ब्वाइज काठमाडौँ, बिग्रेड ब्वाइज क्लब काठमाडौँ, सहलेश युवा क्लब सिरहा, रारा फुटबल क्लब धनकुटा, डाँगीहाट युथ क्लब, बिर्तामोड युनाइटेड झापा, भोजपुर जिल्ला फुटबल क्लब र भारतको युकेएफसी सहभागी छन् ।
प्रतियोगिताको विजेतालाई रु आठ लाख, ट्रफी र प्रमाणपत्र तथा उपविजेताले रु पाँच लाख, ट्रफी र प्रमाणपत्र प्रदान गरिने आयोजक डाँगीहाट युथ क्लबका अध्यक्ष विक्रम वान्तवा राईले जानकारी दिए । सोमबार सहलेश युवा क्लब सिरहा र भारतको युकेएफसी क्लबबीच खेल हुनेछ । रासस
