स्पेस समाचार 
काठमाडौं । टी–२० विश्वकप एसिया छनोटमा नेपालले मलेसियालाई हराउँदै सेमिफाइनलमा स्थान पक्का गरेको छ ।
मलेसियाले टस जितेर पहिलो ब्याटिङ गर्दै नेपाललाई १६६ रनको चुनौती दिएको थियो । नेपालले चार विकेट गुमाएर १२ बल बाँकी छँदै लक्ष्य भेटाएको थियो ।
नेपालका लागि कुशल मल्लले ६५ र कुशल भुर्तेलले ४३ रनको आक्रमक पारी खेलेका थिए ।
मल्लले ३४ बलमा ७ छक्का र २ चौकासहित ६५ रन बनाए । ओपनर भुर्तेलले २५ बलमा ४ छक्का र ४ चौकासहित ४३ रन बनाएका थिए । मल्लले चौका भन्दा धेरै छक्का प्रहार गरेका थिए ।
नेपालको जितसँगै समूह ए बाट सेमिफाइनल पुग्ने अर्को टीम ओमान बनेको छ । ओमानले मंगलवार बिहान सिंगापुरविरुद्ध जित निकालेको थियो । पराजयसँगै सिंगापुर र मलेसिया भने बाहिरिएका छन् ।
नेपाल र ओमानबीच समूह विजेता र उपविजेताका लागि मात्र प्रतिस्पर्धा हुनेछ ।
