स्पेस समाचार 
काठमाडौं–अर्थमन्त्री डाक्टर प्रकाशशरण महतले बेथितिमा चलेको बजेटरी प्रणालीलाई आफूले ठिक ठाउँमा ल्याउने प्रयास गरेको बताएका छन् ।
बुधबार इकोनोमिक मिडिया एशोसिएशन नेपाल इमानले काठमाडौंमा आयोजना गरेको कार्यक्रममा अर्थमन्त्री महतले बजेटलाई ठिक ठाउँमा ल्याउन अझै २ वर्ष लाग्ने बताए । विगतमा अनुत्पादक क्षेत्रमा खर्च भएका कारण बजेटरी प्रणाली नै खलबलिएको उनको दाबी छ । उनले स्रोत नै सुनिश्चित नभइकन घोषणा भएका योजना र शिलान्यस भएका परियोजनाका कारण समस्या आएकाले समाधानको पहल गरिरहेको पनि बताए । समग्रमा अहिले देशको अर्थतन्त्र लयमा फर्किरहेको उनको दाबी छ ।
अर्थमन्त्री महतले बैंक तथा वित्तीय संस्थाहरुबाट लिएको ऋण तिर्नुको विकल्प नरहेको पनि स्पष्ट पारे । केही मानिसहरु निहित स्वार्थ पूर्तिका लागि ऋण तिर्नु पर्दैन भन्दै आन्दोलन गरिरहेको भन्दै उनले यस्तो प्रवृत्तिको पछि नलाग्न आग्रह गरे । कार्यक्रममा नेपाल उद्योग वाणिज्य महासंघका अध्यक्ष चन्द्रप्रसाद ढकालले प्रक्रिया पूरा भएर पनि रोकिएका कम्पनीका आइपीओ निष्कासनका लागि अनुमति दिन आग्रह गरे ।
अध्यक्ष ढकालले बैंकबाट लिएको ऋण तिर्नै पर्दैन भन्ने हिसावले सन्देश गइरहेकाले आम सर्वसाधारणमा अन्योल सिर्जना गरेको बताए । उनले नेपालमा लगानी गर्ने वतावरण बनाउनका लागि विशेष ध्यान दिन आवश्यक रहेको पनि बताए ।
