स्पेस समाचार 
काठमाडौं–प्रमुख प्रतिपक्ष दल नेपाली कांग्रेसले राष्ट्रिय सभा अध्यक्षको निर्वाचनका विषयमा निर्वाचन आयोगले कांग्रेससँग सल्लाह नगरि एकतर्फी निर्वाचनको मिति तय गरेकाे भन्दै आपत्ति जनाएको छ ।
फागुन २९ गते हुने भनिएको राष्ट्रिय सभा अध्यक्षको निर्वाचनमा सरकार र निर्वाचन आयोगले कांग्रेससँग कुनै सल्लाह नगरेको आरोप लगाएको हो । कांग्रेस संसदीय दलका प्रमुख सचेतक रमेश लेखकले राष्ट्रिय सभामा कांग्रेस दोस्रो ठूलो दल भएको जिकिर गर्दै कांग्रेसलाई सोध्दै नसोधि मिति तय गरेको प्रति आपत्ती जनाए । प्रमुख सचेतक लेखकले भने,’राष्ट्रिय सभामा कांग्रेस दोस्रो ठुलो दल हो । हामीलाई त कसैले सोधेको छैन कति गर्ने चुनाव गर्ने भनेर । बजारमा भोलि गर्ने, पर्सी गर्ने भनेर हल्ला सुनिँदै छ । त्यसकारण हाम्रो समेत सल्लाहमा चुनाव गर्नुपर्छ भन्ने हाम्रो कुरा हो ।’
उनले आफ्नो सल्लाहमा मिति तोकिनु पर्ने अडानमा कांग्रेस रहेको समेत दाबी गरेका छन् । यसअघि शनिवार बसेको पदाधिकारी र पूर्व पदाधिकारीको बैठकले कांग्रेसले राष्ट्रिय सभाका अध्यक्षका लागि उम्मेद्वारी दिने निर्णय गरेको थियो ।
