स्पेस समाचार 
काठमाडौं– प्रधानमन्त्री पुष्पकमल दाहालले रुसी सेनामा आवद्ध नेपालीहरूलाई स्वदेश फिर्ता ल्याउन कूटनीतिक पहल गर्ने आश्वासन दिएका छन् ।
मंगलबार बालुवाटारमा रुसी सेनामा आवद्ध नेपालीको जीवन रक्षार्थ अभियानका सदस्यहरूले गरेको भेटमा प्रधानमन्त्री दाहालले रुसी सेनामा कार्यरत नेपालीको उद्धारका लागि सरकारले उच्चस्तरको पहल गर्ने बताएका हुन् ।
नेपाली नागरिकको जीवन रक्षाका लागि सरकार निरन्तर लागिपरेको भन्दै दाहालले रुसी सेनामा कार्यरत नेपालीहरूका परिवारको माग सम्बोधन गर्न प्रतिवद्ध रहेको पनि बताए । रुसी सेनामा कार्यरत नेपालीका परिवारले युद्धमा रहेका नेपालीलाई स्वदेश फर्काउन माग गर्दै काठमाडौंमा अनशन र धर्ना दिएका थिए ।
