स्पेस समाचार 
काठमाडौं–प्रमुख प्रतिपक्षी दल नेपाली कांग्रेसका प्रमुख सचेतक रमेश लेखकले संसदीय छानबिन समिति बनाउन प्रधानमन्त्री पुष्पकमल दाहाल प्रचण्ड सकारात्मक रहेको प्रतिक्रिया दिएका छन् । आइतबार प्रधानमन्त्री प्रचण्डले कांग्रेसका शीर्ष नेताहरूसँग बालुवाटारमा संसद्को गतिरोध खुलाउने विषयमा छलफल गरेका थिए ।
उक्त छलफलपछि पत्रकारहरुसँग कुरा गर्दै कांग्रेस संसदीय दलका प्रमुख सचेतक लेखकले सहकारी प्रकरणको अनुसन्धानका लागि संसदीय समिति बनाउन सकारात्मक भएका बताएका हुन् । प्रमुख सचेतक रमेश लेखकले प्रधानमन्त्रीसँग कांग्रेसले सहकारी प्रकरणमा उपप्रधान एवं गृहमन्त्री रवि लामिछानेमाथि संसदीय छानबिन समिति बनाएर छानबिन हुनुपर्ने अडान राखेको जानकारी दिए ।
लेखकले भने, ‘सहरकारी प्रकरणमा संसदीय छानबिन समिति गठन गर्ने विषयमा प्रधानमन्त्रीज्यूसँग कुराकानी भयो। प्रधानमन्त्रीज्यूले सकारात्मक ढङ्गले लिनुभएको छ । सकारात्मक कुरा नै छ । हामीले हाम्रो कुरालाई यथावत् राखेका छौं ।’
प्रमुख सचेतक लेखकले कांग्रेसले सोमबार बस्ने संसदीय दलको बैठकबाट थप निर्णय गर्ने पनि बताए । उनले भने,’भोलि हाम्रो संसदीय कार्यसमितिको बैठक १ बजे र संसदीय दलको बैठक २ बजे छ, त्यहाँबाट निर्णय गर्नेछौँ ।’
