स्पेस समाचार 
काठमाडौं– लमजुङको क्व्होंलासोथर गाउँपालिका–३ बगुमस्थित पच्युटोलमा पहिरोमा परेर बेपत्ता भएका चार जना मध्ये एक जनाको शव फेला परेको छ । बाँकी तीन जना अझै बेपत्ता भएको प्रहरीले जनाएको छ ।
बेपत्ता भएकामध्ये ६९ वर्षीय रुद्रमान गुरुङको शव फेला परेको वडा नम्बर ३ का वडा सदस्य बिनप्रसाद घलेले जानकारी दिए ।
पच्युटोलमा गए राति पहिराले तीन घर पुरिँदा चार जना बेपत्ता र एक जना घाइते भएका थिए । लगातारको वर्षासँगै घर माथिबाट आएको पहिरोले स्थानीय चित्र घले, रुद्रमान गुरुङ र पञ्चकुमारी गुरुङको घर पुरिएको हो ।
पहिरोमा परी ३६ वर्षीया पञ्चकुमारी गुरुङ र उनकी पाँच वर्षीया छोरी नम्रता तथा सात वर्षीया इच्छा गुरुङ अझै बेपत्ता रहेको जिल्ला प्रहरी कार्यालयका प्रहरी निरीक्षक थानेश्वर चपाइँले जानकारी दिए ।
यसैबीच, लमजुङको दोर्दी गाउँपालिका–९ मा गए राति पहिरोले घर भत्किँदा १६ वर्षीय विकल सुनारको मृत्यु भएको छ ।
उक्त घटनामा १८ वर्षीय मिलन सुनार घाइते भएको जिल्ला प्रहरी कार्यालयका प्रहरी निरीक्षक मेघनाथ चापागाईँले जानकारी दिए ।
विकल र मिलन दाजुभाइ हुन् । दुवै जनालाई आज बिहान उपचारका लागि जिल्ला अस्पताल लमजुङ ल्याइएकामा विकलको उपचारकै क्रममा मृत्यु भएको हो । मिलनको सोही अस्पतालमा उपचार भइरहेको छ ।
बेपत्ता भएकाहरूको बिहानैदेखि स्थानीय र प्रहरीले खोजी गरिरहेका छन् ।
