स्पेस समाचार 
काठमाडौं । कप्तान दीपेन्द्र सिंह ऐरीको आक्रामक ब्याटिङमा सुदूरपश्चिम रोयल्सले विराटनगर किंग्सलाई ९० रनले हराएको छ। १८३ रनको लक्ष्य भेट्टाउने क्रममा विराटनगरले सबै विकेट गुमाएर ९२ रन बनायो। टियु क्रिकेट मैदानमा टस हारेर ब्याटिङको निम्तो पाएको सुदूरपश्चिमले निर्धारित ओभरको खेलमा ७ विकेटको क्षतिमा १८२ रन बनाएको थियो। सुदूरपश्चिमका लागि कप्तान ऐरीले अर्धशतकीय पाली खेले। उनले २३ बलमा अर्धशतक प्रहार गरे। २४ बल खेलेका ऐरीले ३ चौका र ५ छक्कासहित ५७ रनमा अविजित रहे।
दीपेन्द्रले २४ बलमा अविजित ५७ रन बनाए। उनले इनिङ्सको अन्तिम दुई बलमा प्रतिस जिसीलाई लगातार छक्का प्रहार गरेका थिए। अन्तिम ओभरमा मात्र दीपेन्द्रले ३ छक्का प्रहार गरेपछि सुदूरपश्चिमले कुल २३ रन जोडेको थियो। दीपेन्द्रले कुल ३ चौका र ५ छक्का प्रहार गरे। दीपेन्द्र र इशान पाण्डेले आक्रामक ब्याटिङ गरेपछि बिहानको निकै कठिन कन्डिसनमा पनि सुदूरपश्चिमले राम्रो स्कोर बनाएको हो। यी दुईले छैटौं विकेटमा २५ बलमा ४९ रन जोडे। इशानले १६ बलमा २ चौका र १ छक्कासहित २१ रन बनाई रनआउट भए।
