स्पेस समाचार 
काठमाडौं । काठमाडौं महानगरपालिकाका प्रमुख बालेन शाहले प्रधानमन्त्री केपी शर्मा ओलीलाई आफ्नो कार्यकर्ताहरूलाई सामान्य ज्ञान दिएर मात्रै राजनीतिमा लगाउन आग्रह गरेका छन् ।
सोमबार सामाजिक सञ्जालबाट उक्त आग्रह गर्दै यस्तै ज्ञानविहीन भए पछि देश चलाउने ठाउँमा पुग्दा अरूको इशारामा चल्नुपर्ने देखिएको पनि बताएका हुन् ।
बालेनले आइतबार साँझ नेकपा एमाले सांसद रेखा शर्मालाई पक्राउ गर्न माग गर्दै सामाजिक सञ्जाल फेसबुकमा स्ट्याटस पोस्ट गरेका थिए जसको एमालेका कार्यकर्ताले सांसद शर्माको बचाउ गर्दै आएका छन् । त्यसपछि बालेनले पुनः सामाजिक सञ्जालबाट ओलीको आलोचना गरेका हुन् । उनले सांसद शर्माले आफूले गरेको कसुरमा जेल जानसक्ने सम्भावना देखेर आफू छलिन र जोगिन आफैँ सर्वोच्च र उच्च अदालतमा मुद्दा हाल्दै र आफैँ हार्दै आएकी बताएका छन् ।
उनले भनेका छन्,‘समग्रमा भन्नुपर्दा रेखा कुमारी शर्माले आफूले गरेको कसुरमा जेल जानसक्ने सम्भावना देखेर आफू छलिन र जोगिन आफैँ सर्वोच्च र उच्च अदालतमा मुद्दा हाल्दै छिन र आफैँ हार्दै छिन्,महानगरले उनीविरुद्ध हालेको मुद्दा त प्रहरीले अनुसन्धान अघि बढाएकै छैन, अदालतमा प्रवेश गरेकै छैन र हामीले उठाएको कुरा नै त्यही नै हो कि उनले गरेको कसुर बमोजिमको कसुर बमोजिमको कारबाही अघि बढ्नुपर्छ,प्रधानमन्त्री खडक प्रसाद ओलीज्यू तपाईं आफ्नो कार्यकर्ताहरूलाई सामान्य ज्ञान दिएर राजनीतिमा लगाउनु होला, पछि यस्तै ज्ञानविहीन भएर देश चलाउने ठाउँमा पुग्दा तपाईंजस्तै अरू को इसारामा चल्ने हुनुपर्ला।’
उनले अहिले बजारमा सर्वोच्चको फैसलाको आधा पाठ ल्याएर भ्रम छर्ने काम भएको पनि बताए ।
