स्पेस समाचार 
काठमाडौं । अमेरिकाको भर्जिनियास्थित मनसास पार्कबाट सम्पर्कविहीन भएकी नेपाली ममता काफ्लेको घरभित्रका केही तस्वीरहरु सार्वजनिक भएका छन् ।
उनको बेपत्तामा श्रीमान् नरेश भट्टको हात रहेको भन्दै मनसास पार्क प्रहरीले भट्टलाई थुनामा लिएको छ । र, अदालतमा शरीर लुकाएको आरोपमा भएको सुनुवाइका क्रममा अदालत समक्ष पेश गरिएको तस्वीरहरु सार्वजनिक भएको हो ।
युभिए हेल्थ प्रिन्स विलियम मेडिकल सेन्टरमा बालरोग नर्सको रूपमा कार्यरत ममताको हत्या उनकै श्रीमानले गरेको प्रहरीले अदालतमा बताइसकेको छ ।
नरेशले श्रीमतीको हत्या गरेको र उनको शवलाई मानसस पार्कमा रहेको आफ्नो घरबाट घिसारेर बाहिर निकालेको आरोप प्रहरीले लगाएको छ । ममताको शव फेला नपरेको कारण अहिले नरेशविरुद्ध मृत शरीर लुकाएको सम्बन्धमा छैटौं श्रेणीको आपराधिक आरोप लगाइएको छ ।
कार्पेटमा रगतको दाग देखिएको, वाथटबमा रगत बगेको, भट्टले वालमार्टबाट फरक साइजका तीनवटा चक्कु किनेर ल्याएको लगायतका प्रमाणहरु प्रहरीले अदालतमा बुझाइसकेको छ ।
भट्टको कोठाभित्र कार्पेट र बाथरुममा रगतका टाटाहरु देखिएको फाटो मनसास पार्क प्रहरीले अदालतमा पेश गरेको थियो । अहिले तिनै प्रमाणहरु सार्वजनिक भएका हुन् ।
नरेशलाई पक्राउ गरेर लैजाँदा मनसास प्रहरीका अधिकारीहरुले घरबाट कार्पेट पनि लगेका थिए ।
हिरासतमा रहेका नरेशले अहिलेसम्म अपराध स्वीकार गरेका छैनन् । उनलाई मनसासस्थित प्रिन्स विलियम अदालतमा पेश गरिएको थियो । नरेशका वकिलहरुले उनीविरुद्ध ठोस प्रमाण नभएको र कुनै अपराधिक पृष्ठभूमि नरहेकाले धरौटीमा छोडन अपिल गरेका थिए । तर, सुनवाइपछि अदालतले उनलाई धरौटीमा छोड्न अस्वीकार गरेको छ । अर्को सुनवाइ २४ अक्टोबरमा तोकिएको छ ।
