स्पेस समाचार 
काठमाडौं । नेपाल नागरिक उड्डयन प्राधिकरणले श्री एयरलाइन्सलाई पुनः उडान अनुमति दिएको छ ।
प्राधिकरणको विज्ञ टोलीले श्रीका सबै जहाजको प्राविधिक जाँच, इन्जिनियरिङ, अपरेसन, सुरक्षा तथा कम्पनीको वित्तीय स्थिति र प्रशासनिक क्षमताको समेत अध्ययन गरेको थियो । त्यसपछि प्राधिकरणले श्रीलाई पुनः सेवा सञ्चालनको अनुमति दिएको हो ।
प्राधिकरणबाट पुनः उडानको अनुमति पाएसँगै शनिबारदेखि श्री एयरलाइन्सले नियमित उडान गर्ने कम्पनीले बताएको छ ।
श्री एयरलाइन्सका जहाज उडानका लागि पूर्ण सुरक्षित रहेको समेत कम्पनीले जनाएको छ ।
बिहीबार बिहान काठमाडौंबाट भैरहवा गइरहेको जहाजको एउटा इन्जिन फेल भएको र आगो समेत देखिएपछि धादिङबाट फर्काएर काठमाडौंमै आकस्मिक अवतरण गराइएको थियो । त्यसपछि छानविन पुरा नभएसम्म प्राधिकरणले श्रीको सबै जहाजहरु ग्राउण्डेड गरेको थियो ।
प्राधिकरणको यो जाँचबाट आफ्ना सबै जहाज सुरक्षित भएको पुष्टि हुने समेत कम्पनीले उल्लेख गरेको छ ।
