स्पेस समाचार 
काठमाडौं । वैशाख १० गते हुने उपचुनावमा चितवन निर्वाचन क्षेत्र नं २ का २९ स्थललाई अतिसंवेदनशीलको सूचीमा राखिएको छ ।
निर्वाचन स्थललाई दुई भागमा वर्गीकरण गर्दै ४३ मध्ये २९ स्थललाई अतिसंवेदनशीलको सूचीमा राखिएको हो। बाँकी १४ स्थललाई भने संवेदनशील स्थलको सूचीमा राखिएको प्रमुख जिल्ला अधिकारी सुरेन्द्र पौडेलले जानकारी दिए ।
चितवन क्षेत्र नम्बर २ मा १ लाख २४ हजार ६ सय ९५ जना मतदाता छन् । उनीहरुले ४३ स्थलका १ सय ३८ केन्द्रबाट मतदान गर्ने छन् । गएको मंसिर ४ गते सम्पन्न प्रतिनिधि सभा सदस्य चुनावमा निर्वाचित राष्ट्रिय स्वतन्त्र पार्टीका सभापति रवि लामिछाने नागरिकता विवादका कारण सांसद पदबाट मुक्त भएकाले यो क्षेत्रमा उपचुनाव हुन लागेको हो ।
चितवन क्षेत्र नम्बर २ मा हुने उपचुनावका लागि लामिछानेसहित २२ जनाको उम्मेदवारी परेको छ ।
