स्पेस समाचार 
काठमाडौं– चौथो टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगिता २०८० आजदेखि हुँदैछ ।
तयारी पुरा भएसँगै आयोजकले उद्घाटन खेलमा गण्डकी प्रदेश र नेपाल आर्मी क्लब भिड्ने भएको जनाएको छ । प्रतियोगितामा पहिलो पटक दुई विदेशी क्लब र केही सहभागी टिमहरूमा विदेशी खेलाडीहरू समेत सम्मिलित भएपछि चौथो टाइगर कप रोचक हुने आयोजक टाइगर ग्रुप अफ पोखरा नेपालका अध्यक्ष नारायण प्रसाद शर्माले बताए ।
खेलकुद विकास र सामाजिक अभियानको क्षेत्रमा विशेष योगदान दिँदै आएको टाइगर ग्रुप अफ पोखरा नेपालको आयोजनामा माघ एक गतेदेखि छ गतेसम्म हुने उक्त प्रतियोगिताको खेल तालिका अनुसार उद्घाटन खेलमा गण्डकी र नेपाल आर्मी पक्का भएको हो । देशकै ठुलो धनराशि पुरस्कार भएको उक्त प्रतियोगिताको उद्घाटन खेल सोमबार दिउँसो साढे एक बजे सुरु हुने छ ।
