स्पेस समाचार 
काठमाडौं– नेपाल खेलकुद पत्रकार मञ्चले हरेक वर्ष आयोजना गर्दै आएको एनएसजेएफ–पल्सर स्पोटर्स अवार्डको २० औँ संस्करणका लागि आइतबार पुरुष वर्ष खेलाडी र महिला वर्ष खेलाडीको मनोनयन सार्वजनिक गरेको छ ।
एनएसजेएफ–पल्सर स्पोर्टस अवार्डको २०औँ संस्करण माघ २८ गते काठमाडौँमा हुँदैछ । उक्त स्पोर्टस अवार्डका लागि मञ्चले विगतमा चार विधामा उत्कृष्ट पाँच–पाँचजनाको मनोनयन सार्वजनिक गर्दै आएको थियो । यसपटक भने मञ्चले चारै विधामा पहिलो चरणमा आठ–आठजनाको मनोनयन सार्वजनिक गरेको छ ।
यसपटकदेखि नयाँ प्रयोग थालिएको मञ्चले जनाएको छ । वर्षभरी उत्कृष्ट प्रदर्शन गर्ने बढीभन्दा बढी खेलाडीलाई स्पोर्टस अवार्डमा समेट्ने उद्देश्यले यस्तो प्रयोग गरिएको मञ्चको दाबी छ । उत्कृष्ट आठको मनोनयन गरिने चार विधामा वर्ष पुरुष खेलाडी, वर्ष महिला खेलाडी, वर्ष युवा खेलाडी र वर्ष प्रशिक्षक रहेका छन् ।
मनोनयनमा परेका आठजनाबाट उत्कृष्ट तीनको छनोट केही दिनमा पत्रकार सम्मेलनमार्फत गरिने जानकारी पनि मञ्चले दिएको छ । अन्तिम मनोनयन सूचीमा परेका तीनमध्येबाट कार्यक्रमको दिन विजेता चयन गरिने छ । मञ्चले वर्ष पुरुष खेलाडी र वर्ष महिला खेलाडीको उत्कृष्ट आठको मनोनयन आइतबार सार्वजनिक गरेको हो । वर्ष २०७९ सालमा गरेको प्रदर्शनका आधारमा खेलाडीलाई मनोनयनमा पारिएको हो ।
