स्पेस समाचार 
काठमाडौं– सञ्चार तथा सूचना प्रविधि मन्त्री रेखा शर्माले संविधानमा व्यवस्था गरेका मौलिक हकहरू व्यवहारमा कार्यान्वयन गर्न नसकेको बताएका छन् ।
सोमवार काठमाडौंमा गोरखापत्र प्रकाशनको १२४ औँ वर्ष प्रवेश तथा संस्थानको ६२ औँ वार्षिकोत्सवको अवसरमा आयोजित कार्यक्रमलाई सम्बोधन गर्दै उहाँले यस्तो बताउनुभएको हो । उनले संविधानमा मौलिक हकका धेरै राम्रा व्यवस्था गरेको उल्लेख गरे । उनले जातीय छुवाछुत, लैङ्गिक समानता लगायतका थुप्रै विषयहरू संविधानमा व्यवस्थित गरेको भए पनि आजसम्म पनि व्यवहारमा कार्यान्वयन हुन नसकेको बताए । उनले व्यवहारिक रूपमा कार्यान्वयन हुन नसक्नुको पछाडिको कारणहरू पत्ता लगाइ सरकारी सञ्चारमाध्यमबाट जनता समक्ष लैजान आवश्यक रहेको पनि बताए । उनले अहिलेसम्म प्राप्त गरेका उपलब्धिहरूको रक्षा गर्न जरुरी रहेको बताए ।
उनले भने, ‘हामी अहिले नयाँ समयमा छौं । नयाँ समयमा गइसकेपछि हामीले त्यही ढङ्गबाट अघि बढ्नुपर्छ । हामीले संविधानमा मौलिक हकका धेरै राम्रा व्यवस्था गरेका छौं । जातीय छुवाछुत, लैङ्गिक समानता लगायतका थुप्रै विषयहरू संविधानमा व्यवस्थित गरेका छौँ । तर त्यो कुरा आजका दिनमा पनि व्यवहारमा कार्यान्वयन हुन सकेको छैन । व्यवहारिक रूपमा कार्यान्वयन हुन नसक्नुको पछाडिको कारणहरू पत्ता लगाइ यस्ता कुरालाई सरकारी मिडियामार्फत जनसमक्ष लैजान सक्यौँ भने मलाई लाग्छ सचेतनाको पक्षमा राम्रो भूमिका निर्वाह गर्दछ । आजका दिनमा आउँदासम्म हामीले प्राप्त गरेका उपलब्धिहरूलाई जोगाउन जरुरी छ ।’
गोरखापत्र संस्थानको संरचनागत अवस्था र व्यवस्थापन पक्षको गहिरो अध्ययन गरी भौतिक पूर्वाधार, जनशक्ति व्यवस्थापन र बजारको व्यवस्था गर्नुपर्ने समय आएको बताए । उनले सरकारी मिडियाहरू सरकारका भजन मण्डलीका रूपमा मात्रै रहनु नहुने बताए । उनले सरकारी मिडियाहरू सरकार र जनताबिचको पुल बन्न सक्नुपर्ने बताए ।
