राजेश अभिराज यादव 
जनकपुरधाम–धनुषामा एक स्कुल बसले मोटरसाइकललाई ठक्कर दिँदा मोटरसाइकलमा सवार एक जनाको मृत्यु भएको छ ।
औरही–तिन कोरियाको बीचमा पर्ने जोगियारास्थित स्कुल बसले मोटर साइकलमा ठोकिएका थियो । विदेह नगरपालिका वडा नम्बर ७ जोगियारस्थित तिन कोरियाबाट औरही तर्फ जाँदै गरेको प्रदेश २ ००२ ००४ प ३७८२ नम्बरको मोटरसाइकल र विपरीत दिशातर्फबाट जाँदै गरेको ना ४ ख ५७० नम्बरको स्कुल बसबीच ठक्कर भएको हो ।
सो दुर्घटनामा विदेह नगरपालिका वडा नम्बर ७ बस्ने २० वर्षीय सन्तोष यादवको मृत्यु भएको धनुषा प्रहरीले जनाएको छ ।
दुर्घटनापछि गम्भीर घाइते भएका यादवको उपचारको लागि जनकपुर ल्याउँदै गर्दा बाटोमै मृत्यु भएको धनुषा प्रहरीले जनाएको हो ।
तिनकोरियास्थित सञ्चालनमा रहेको लर्ड गणेश ईगलिस बोर्डसँग स्कुलको बसले सन्तोषलाई ठक्कर दिएको थियो । अहिले स्कुल बस तिन कोरिया पुलिसको नियन्त्रणमा रहेको छ । बस चालक तिन कोरिया बस्ने रमेश मण्डल फरार रहेको प्रहरीले जनाएको छ ।
