नवीन कर्ण 
काठमाडौं– नेकपा एमालेका अध्यक्ष केपी शर्मा ओलीले मुलुकको राजनीतिक गतिरोध अन्त्य गर्न नेपाली कांग्रेस गम्भिर हुनुपर्ने बताएका छन् ।
विराटनगर विमानस्थलमा मङ्गलवार सञ्चारकर्मीसँग कुरा गर्दै ओलीले राजनीतिक गतिरोध अन्त्य गर्न कांग्रेसले आफूलाई सम्हालेर लोकतान्त्रिक मूल्य मान्यताको अभ्यासलाई आत्मसात् गर्नुपर्ने बताए । उनले लोकतान्त्रिक मूल्य मान्यतालाई बिर्सेर नेपाली कांग्रेसले संसदमा गर्दै आएको गतिविधिले कांग्रेसलाई फाइदा नहुने बताए । कांग्रेसले गरिरहेको सदन अवरोध केवल सत्ताका लागि भएको उनको दाबी थियो । राजनीतिक स्थायित्वका लागि दलहरू एक हुनुपर्ने वेलामा कांग्रेसको यस्तो गतिविधिले प्रतिगामी शक्तिलाई बल पुग्ने उनको भनाई थियो ।
संसद् अवरोधका कारण बजेट पास गर्न समस्या हुनसक्ने सन्दर्भमा सोधिएको प्रश्नको जवाफ दिँदै अध्यक्ष ओलीले सरकारले प्रतिपक्षलाई पेलेर नजाने बताए । यद्यपि विगतमा यस प्रकारका अवरोधकाबिच बजेट पास भएका उदाहरणहरू रहेको दाबी गरे । उनले काँग्रेसको आफूले जे भन्यो त्यही हुनुपर्छ भन्ने सोचका कारण पछिल्लो अवस्था आएको दाबी समेत गरे ।
अध्यक्ष ओलीले नेकपा एमाले मुलुकको समग्र विकासका लागि केन्द्रित रहेको समेत बताए ।
