स्पेस समाचार 
काठमाडौं– नेकपा एमालेका प्रमुख सचेतक महेश बर्तौलाले जेठ १५ गते काँग्रेसले संसदमा विरोध गरे पनि अर्थमन्त्रीले संसदबाट नै बजेट भाषण गर्ने बताएका छन् ।
आइतबार प्रतिनिधि सभा बैठकपछि संसदभवन बाहिर सञ्चारकर्मीहरूसँग प्रतिक्रिया दिँदै यस्तो बताएका हुन् । उनले संविधान बमोजिम जेठ १५ गते संसदबाट बजेट ल्याउनुपर्ने प्रावधान रहेको बताए । उनले संविधानले दिएको व्यवस्थालाई सरकारले अवमूल्यन गर्न नमिल्ने भन्दै १५ गते बजेट ल्याउनुपर्ने संवैधानिक बाध्यता रहेको बताए । उनले नेपाली काँग्रेसले उठाएको विषयमा सरकार सकारात्मक रहेको बताए । उनले नेपाली काँग्रेसले बजेट ल्याउनको लागि सहयोग गर्नुपर्ने बताए । उनले काँग्रेसले संसद्को अवरोध राखे पनि सरकारले बजेट अन्य बाटोबाट भन्दा पनि सांसदभित्रबाट ल्याउने बताए ।
उनले भने,‘ संविधान बमोजिम जेठ १५ गते बजेट ल्याउनुपर्छ । नेपाली काँग्रेसलाई हाम्रो पटक–पटकको आग्रह हो । संविधानले दिएको व्यवस्थालाई सरकारले अवमूल्यन गर्न सक्दैन । जेठ १६ गते बजेट ल्याउने सुविधा सरकारलाई छैन । नेपाली काँग्रेसले जे विषय उठाउनुभएको छ । उठाउने कुरामा रोक्नुस् भन्दैनौँ तर सहमतिमा आउनुपर्छ भन्छौँ । सरकारले आगामी आर्थिक वर्षको बजेट यही संसदबाट ल्याउँछौँ । नेपाली काँग्रेसले बजेट ल्याउनको लागि सहयोग गर्छ । काँग्रेस सबै कुरा बुझेको राजनीतिक शक्ति हो । लामो संसदीय अभ्यासबाट आएको र भोली संसदमा आएर सरकारमा पुग्ने काँग्रेस हो भने संवैधानिक व्यवस्थाको बाध्यतालाई बुझेर सहजिकरण गर्छ । अवरोध गरिराख्नु भयो भने पनि अरू बाटोबाट भन्दा पनि सांसदभित्रबाटै बजेट आउँछ । अर्थमन्त्रीलाई बजेट पढ्न नाराबाजीले असर प¥यो भने पनि कानमा कपास राखेर भए पनि बजेट पढ्नु पर्ने हुन्छ । सरकारले प्रतिपक्षलाई पेल्न खोजेका छैनौ सहमतिमा ल्याउन खोजेका छौं । प्रमुख प्रतिपक्षले भनेका सबै विषयवस्तुहरूलाई स्वीकार गर्न तयार उहाँहरूले भनेका सहकारीहरूको नाम राख्न पनि तयार,गोरखा मिडिया राख्न पनि तयार छौं । तर गोरखा मिडियाका गार्डदेखि एमडीसम्म संसदीय समिति जान मिल्छ की मिल्दैन । त्यसैले सत्तापक्षले होइन काँग्रेसले बलमिचाइँ गरेको छ ।’
उनले सरकारले प्रमुख प्रतिपक्षलाई पेल्न नखोजेको भन्दै सहमतिमा ल्याउन खोजेको बताए। उनले प्रमुख प्रतिपक्षले भनेका सबै विषयवस्तुहरूलाई स्वीकार गर्न तयार रहेको बताए ।
