स्पेस समाचार 
काठमाडौं–पछिल्लो समय सत्ता गठबन्धन भत्किन्छ कि भन्ने आँकलन भइरहेको बेला प्रधानमन्त्री पुष्पकमल दाहाल प्रचण्डले सत्ता कुनै पनि हालतमा नभत्तिकने प्रस्ट पार्दे आएका छन् । खास गरी सत्तारुढ दल भित्र आफ्नो अपमान भएको आभास गरिरहेका माधव नेपाल घरी सत्ता पक्ष त घरी प्रतिपक्षी कहाँ पुग्न थालेपछि सत्ता गठबन्धनमा अनेकौँ कोणबाट व्याख्या भइरहेको छ ।
केही दिन अघि नेकपा एकीकृत समाजवादी पार्टीका अध्यक्ष माधव कुमार नेपाल प्रमुख प्रतिपक्षी दल नेपाली कांग्रेसका सभापति शेर बहादुर देउवा निवासमा भएको प्रतिपक्षी दलको बैठकमा सहभागी समेत भए । तर त्यसको भोलिपल्ट बिहीबार नेकपा एकीकृत समाजवादी पार्टीका सम्मानित नेता झलनाथ खनालले आफ्नो पार्टी सत्ताबाट नबाहिरिने भन्दै प्रधानमन्त्री प्रचण्डलाई भेटेर आश्वस्त पारे ।
तर त्यो आशङ्काबिच प्रधानमन्त्री पुष्पकमल दाहाल प्रचण्डले आफ्नो पार्टीको संसदीय दलको बैठकमा नेपाललाई आफ्नै सल्लाहमा भेट्न गएको भन्दै आश्वस्त पारे । बैठकमा प्रधानमन्त्री प्रचण्डले बोलेको कुरालाई उद्धृत गर्दै एक माओवादी सांसदले भने,‘सरकार दायाँबायाँ हुन्छ कि भन्ने कुनै आशङ्का गर्नु पर्दैन । माधवजी उता (विपक्षी गठबन्धन) मा गएको भन्ने कुरा केही होइन । उहाँ मेरै सल्लाहमा जानु भएको हो’, प्रचण्डको भनाइ उद्धृत गर्दै एक सांसदले भने, ‘उहाँले जानुअघि मसँग सल्लाह गर्नुभएको थियो । विपक्षी अलाइन्स बनाउन जानु भएको होइन ।’
नेपाल भने नेकपा एमालेका अध्यक्ष केपी शर्मा ओली आफूलाई प्रधानमन्त्री बन्नबाट रोक्नका लागि अनेकौँ प्रपञ्च गरेको भन्दै गठबन्धनभित्र असन्तुष्टि व्यक्त गर्दै आएका छन् ।
