स्पेस समाचार 
काठमाडौं–नेपाली कांग्रेसकी सांसद ईश्वरीदेवी न्यौपानेले सिंहदरबारमा सर्वसाधारण जनतालाई हाफ पाइन्ट र चप्पल लगाएर प्रवेश गर्न नदिइएको भन्दै सरकारको जवाफ माग गरेका छन् ।
आइतबारको प्रतिनिधि सभा बैठकमा आकस्मिक समयमा बोल्दै सांसद न्यौपानेले संसद् भवनमा सर्वसाधारण जनतालाई चप्पल र हाफ पाइन्ट लगाएर प्रवेश नदिएको भन्दै आपत्ति जनाएकी हुन् । उनले सांसदहरूले जुनसुकै प्रकारको पोसाक लगाएर पनि आउन सक्ने तर सर्वसाधारणको पोसाक हेरेर रोकिने गरेको भन्दै त्यसो गर्नु नहुने बताए । उनले सांसद र मन्त्रीहरूले कस्तो पोसाक लगाएर आउनुपर्ने हो भन्ने रुलिङ हुनुपर्ने बताए ।
उनले भने– ‘यो संसद्मा मर्यादित ड्रेस लगाएर आउने हामी कति जना छौँ ? हामी साडीमा आउँछौँ कि ? कोट, पाइन्ट, टाई लगाएर आउँछौँ कि ? आफ्नो मातृ ड्रेस लगाएर आउँछौ कि ? आज यो संसद्मा कोही फ्रक लगाएर आउनुभएको छ । कोही टिसर्ट र पाइन्ट लगाएर आउनुभएको छ । कोही जम्पर लगाएर आउनु भएको छ । हामीलाई चाहिँ सबै छुट ? अनि जनतालाई चाहिँ त्यसमा बन्देज ? नियम बनाउने हामी माननीयले चाहिँ जस्तो लगाएर यहाँ आए पनि भयो । नौरङ्गी फेसन लगाएर आए पनि हुन्छ हामीले चाहिँ केही गर्नु नपर्ने ? बिचरा जनताहरू हाफ पाइन्ट लगाएर प्रवेश नपाउने सिंहदरबारको ढोकामा । चप्पल लगाएर हेर्न नपाउने संसद् भवनमा । अत्यन्तै अप्ठ्यारो विषय हो । त्यस कारणले सभामुखमार्फत म प्रश्न पनि राख्न चाहन्छु सरकारलाई कारण के हो रु हाफ पाइन्ट लगाएर भित्र जान नपाउने । हामी चाहिँ सबै ड्रेस लगाएर यहाँ आइरहेका छौँ । नेपालका सांसद र मन्त्रीले कस्तो ड्रेस लगाउँछ ? बाहिरतिर पनि हेरौँ । संसद् पस्दा हामीले कस्तो ड्रेस लगाएर पस्नुपर्छ भन्ने सभामुखबाट रुलिङ होस् । सर्वसाधारण जनतालाई के कारणले रोक्यो त्यसमा म सरकारको ध्यानाकर्षण गराउन चाहन्छु ।’
उनले सर्वसाधारण जनतालाई पोसाकका कारण सिंहदरबार र संसद् भवन दुवै ठाउँमा रोकिएको भन्दै यसप्रति सरकारको ध्यानाकर्षण गराइन् ।
