स्पेस समाचार 
काठमाडौं–अतिरिक्त समयको पारिश्रमिकको माग गर्दै आन्दोलनमा उत्रिएका सङ्घीय संसद्का कर्मचारीहरूको माग सम्बोधनका लागि सरकारले कानुन, न्याय तथा संसदीय मामिला मन्त्री पदम गिरीको संयोजकत्वमा सहजीकरण समिति गठन गरेको छ ।
आइतबार बिहान प्रधानमन्त्री निवास बालुवाटारमा प्रधानमन्त्री र प्रमुख दलका शीर्ष नेतासहित बसेको बैठकले मन्त्री गिरीको संयोजकत्वमा तीन सदस्यीय सहजीकरण समिति गठन गरेको हो ।
समितिमा अर्थ मन्त्रालयका सचिव र सङ्घीय संसद्का महासचिव सदस्य रहेका छन् । कर्मचारीहरूको आन्दोलन नरोकिएपछि उक्त विषयलाई लिएर प्रधानमन्त्री पुष्पकमल दाहाल प्रचण्डले आइतबार बिहान सभामुख देवराज घिमिरे, राष्ट्रिय सभाका अध्यक्ष नारायणप्रसाद दाहाल, पूर्व प्रधानमन्त्री एवं नेकपा एमालेका अध्यक्ष केपी शर्मा ओली, अर्थमन्त्री वर्षमान पुन, कानुन, न्याय मन्त्री पदम गिरी, मुख्य सचिव डा वैकुण्ठ अर्याल र सङ्घीय संसद्का महासचिव पद्मप्रसाद पाण्डेलाई बोलाएर छलफल गरेका थिए ।
सङ्घीय संसद्का कर्मचारीहरूले आन्दोलनबारे प्रमुख प्रतिपक्षी दल नेपाली कांग्रेस सहितका सांसदहरूले सदनमा माग सम्बोधनका लागि सरकारको ध्यानाकर्षण गरेका थिए ।
