स्पेस समाचार 
काठमाडौं–पूर्व सभामुख एवं नेकपा (माओवादी केन्द्र) का उपाध्यक्ष अग्निप्रसाद सापकोटाले संविधानमा उल्लेख भएको समाजवादको व्याख्या गरेर जाने बेला आएको बताएका छन् ।
शुक्रवार काठमाडौंमा भएको जगबहादुर बोहराको जीवनी तथा संस्मरणहरू लोकार्पण समारोहलाई सम्बोधन गर्दै उनले यस्तो बताएका छन् । उनले समाजवाद संविधानमा उल्लेख गरिए पनि राम्रो व्याख्या नगरिएको बताए । उनले आफ्नो जीवनको अन्तिम घडीसम्म कुनै पनि कुरा त्याग्न परे आफू त्याग्न तयार रहेको घोषणा गरे । उनले सारा तागत लगाएर नेपाली जनताको समाजवाद स्थापना गर्ने सपना साकार पार्नुपर्ने बताए ।
उनले भने, ‘वास्तवमा आज हामी उहाँलाई यो सम्मान किन गर्दै छौँ त भन्दा यो लोकार्पण किन गर्दै छौँ त भन्दा हामी हामी ठुलो तयारीमा फेरि जाँदै छौँ । राष्ट्रलाई विपद् परेको बेलामा, विपद्को भुमरीमा परेको बेलामा त्यसलाई जोगाउनका लागि हामी जाँदै छौँ । समाजवाद संविधानमा उल्लेख छ तर त्यसको राम्रो व्याख्या छैन । अब व्याख्या गरेर अघि जानुपर्छ । अघि गयौँ भने यही नै हुनेछ की कमरेड जगबहादुर बोहराप्रतिको सच्चा श्रद्धाञ्जली । म के विश्वास दिलाउन चाहन्छु भने जीवनको अन्तिम घडीसम्म मैले त्याग्न केही कुरा बाँकी छ भने सम्पूर्ण कुरा त्याग्न म तयार छु । सारा तागत लगाएर हामी अघि बढौँ । नेपाली जनताको समाजवाद स्थापना गर्ने सपना साकार भई छोड्नेछ ।’
पूर्व सभामुख सापकोटाले प्रतिष्ठानलाई माथि उठाउन आफूले गर्नुपर्ने सबै सहयोग गर्न प्रतिबद्ध रहेको बताए ।
