स्पेस समाचार 
काठमाडौं– नेपाली कांग्रेसका सांसद एनपी साउदले गृह जिल्ला कञ्चनपुरमा बाढीबाट ज्यान गुमाएकाका परिवारलाई क्षतिपूर्तिको व्यवस्था गर्न र विस्थापितहरूलाई तत्काल पुनर्स्थापना गर्न सरकारसँग माग गरेका छन् ।
प्रतिनिधिसभाको मङ्गलवार बसेको बैठकको सुरुवातमै सभामुख देवराज घिमिरेसँग समय माग्दै उनले स्थानीय प्रशासन, स्थानीय तह र सामाजिक सङ्घ–संस्थाको भरमा मात्रै कञ्चनपुरमा बाढी पु¥याएको विपद्लाई छोड्न नसकिने बताए ।
‘कञ्चनपुरमा बाढीले ठुलो सङ्ख्यामा जीवन र धन दुवैको क्षति भएको छ । आवश्यक राहतको केन्द्र सरकारले प्रबन्ध गर्न र उद्धारका कामहरूलाई अगाडि बढाउन, दिवङ्गतका परिवारलाई क्षतिपूर्तिको व्यवस्था गर्न, विस्थापितहरूलाई तत्काल पुनर्स्थापनाको काममा पनि केन्द्र सरकारले ध्यान दिन आवश्यक छ,’ साउदले भने, ‘स्थानीय प्रशासन, स्थानीय तह र सामाजिक सङ्घ–संस्थाको भरमा मात्रै यत्रो ठुलो विपद्लाई छाड्न सकिन्न । यतातिर सरकारको ध्यान जाओस् ।’
साउदले पटक–पटक सरकारलाई बाढीको पूर्व तयारी गर्न, बाढी नियत्रणको काममा सजग रहन आग्रह गरिए पनि सरकारले बाढी नियन्त्रण, तटबन्ध निर्माणमा उपयुक्त समयमा ध्यान नदिएकाले समस्या लगातार बढ्दै गएको पनि बताए ।
‘पटक–पटक सरकारलाई बाढीको पूर्व तयारी गर्नुपर्छ भन्दै आएका छौँ । बाढी नियत्रणको काममा सरकार सजग रहनुपर्छ भन्दै आएका छौँ,’ उनले भने, ‘तर अहिलेसम्म सरकारले बाढी नियन्त्रण, तटबन्ध निर्माणमा उपयुक्त समयमा ध्यान नदिएकाले समस्या लगातार बढ्दै गएको छ ।’
पूर्व परराष्ट्र मन्त्री साउदले बाढी–पहिरोबाट देशभर ८० जनाको मृत्यु भइसकेको पनि संसद्लाई जानकारी गराए । ‘बाढी पहिरोबाट देश भरी ८० को जीवन समाप्त भइसकेको अवस्था छ । कञ्चनपुरमा भीषण बाढी रेकर्डको रूपमा रहिआएको छ,’ उनले भने, ‘कञ्चनपुरको पुनर्वास नगरपालिका– ५ रातो खाली खोलामा लक्ष्मी बोगटी सिर्जना बोगटी र आरती बोगटीको देहावसान भएको छ ।
कृष्णपुर नगरपालिका–१ का सागर धानुकका ७ महिना छोरा सोनु धानुकको पनि निधन भएको छ । बेलडाँगी गाउँपालिका–३ बैबाहका २३ डम्बर चौधरी बेपत्ता अवस्थामा हुनुहुन्छ । दोधारा–चाँदनी नगरपालिकामा भर्खरै एउटा महिलाको शव फेला परेको खबर आएको छ । पहिचान भइसकेको छैन ।’
