स्पेस समाचार 
काठमाडौं–रुसी सेनामा कार्यरत नेपालीको जीवन रक्षाको माग गर्दै प्रदर्शनमा उत्रिएका १४ जनालाई प्रहरीले नियन्त्रणमा लिएको छ । सोमबार सिंहदरबार अगाडि प्रदर्शनमा उत्रिएका अभियन्ता कृतु भण्डारीसहित १४ जनालाई प्रहरीले नियन्त्रणमा लिएको हो ।
उनीहरूले रुसी सेनामा गएर सम्पर्कविहीन भएकाहरूको खोजी, मृत्यु भएकाहरूको शव फिर्ता र अलपत्र परेकाहरूको उद्धारको माग राख्दै सिंहदरबारको दक्षिणी गेट अगाडि प्रदर्शन गरेका थिए ।
रुसी सेनामा रहेका नागरिकको जीवन रक्षाको लागि सचेतना अभियानकी अभियन्ता कृतु भण्डारी सहित पीडित परिवारले यसअघि सरकारलाई ज्ञापन पत्र बुझाउँदै यथाशक्य नेपाल फिर्ता गरिदिन अनुरोध गरेका थिए । रुसी सेनामा कार्यरत करिब दुई दर्जन नेपालीहरूले ज्यान गुमाइसकेका छन् भने कयौँ सम्पर्क विहीन रहेको पीडितहरूले जनाएका छन् ।
