स्पेस समाचार 
काठमाडौं । संघीय संसद्को हिउँदे अधिवेशनको पहिलो बैठक शुक्रबार दिउँसो सुरु भएको छ। पहिलो बैठक सुरु भएर सभामुख देवराज घिमिरेले राष्ट्रपतिको कार्यालयले पठाएका पत्र पढेर कार्यसूचीमा प्रवेश गर्ने बित्तिकै राष्ट्रिय स्वतन्त्र पार्टीका सांसदहरूले उठेर विरोध जनाएका छन् ।
विरोध जनाउनेमा रास्वपाका सांसद छन् । उनीहरूले सरकारले ल्याएका ६ वटा अध्यादेश फिर्ता र सभापति रवि लामिछानेको निलम्बन फुकुवा गर्नुपर्ने माग गरेका छन् । सांसद सोविता गौतमले आफ्ना कुरा राख्न दिन सभामुख घिमिरेलाई आग्रह गरिरहेकी छन् । उता सभामुखले दलीय रूपमा विचार राख्न दिने भन्दै बोल्न दिएका छैनन् ।
सभामुखले पटक–पटक कार्यसूचीमा रहेको समयमा आफ्ना कुरा राख्न भनिरहेका छन् । सभामुखले बस्न आदेश दिए पनि रास्वपा सांसदहरू तयार भएका छैनन् । सरकारले यसअघि ल्याएका ६ वटा अध्यादेशबारे अस्वीकारको सूचना दर्ता गर्ने निर्णय गरेको रास्वपाले उठेर विरोध जनाएको हो ।
रास्वपाले विरोध जनाएपछि सबै दलका नेतालाई बोल्ने समय दिएकाले आसन ग्रहण गर्न रास्वपा सांसदहरूलाई आग्रह गरे । अहिले बोल्ने समय कसैलाई नदिएको बताएका घिमिरेले पटक पटक बस्न भने पनि रास्वपा सांसदहरूले मानेनन् ।
शुक्रबार नै रास्वपाका सभापति रवि लामिछानेले अरू सांसद लिएर सभामुख घिमिरेलाई भेट्दै पुस ८ गतेदेखि निलम्बित भएको सांसद पद फुकुवा गरिदिन भनेका थिए । तर सभामुख घिमिरेले अध्ययन गर्ने जवाफ दिएर पठाइदिए ।
यो बैठकमा संघीय संसद् सचिवालयले सभामुख देवराज घिमिरेले अधिवेशन आव्हान सबन्धमा राष्ट्रपतिबाट प्राप्त पत्र पढेर सुनाउने तालिका छ । राष्ट्रपति कार्यालयको र प्रधानमन्त्री तथा मन्त्रिपरिषद् कार्यालयबाट प्राप्त मन्त्रिपरिषद् सदस्यको कार्यभार तोकिएको सम्बन्धी पत्रको ब्यहोरा पनि पढिँदै छ ।
त्यसपछि आजको बैठकमा प्रतिनिधिसभा नियमावली २०७९ नियम १० बमोजिम बैठकको अध्यक्षता गर्न सांसदहरूको नामावली सार्वजनिक गर्ने तालिका छ बैठक आरम्भको अवसरमा दलीय मान्यता अनुसारको धारणा र मन्तव्य राख्ने क्रम सुरू हुनेछ ।
सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश–२०८१ प्रधानमन्त्री केपी शर्मा ओलीले पेश गर्ने संसद् सचिवालयले जनाएको छ ।
