स्पेस समाचार 
काठमाडौं । नेपाल शिक्षक महासंघले बुधबारदेखि काठमाडौंमा सडककेन्द्रित आन्दोलन थाल्दैछ ।
चरणबद्ध आन्दोलनमा रहेको महासंघ संसद्को हिउँदे अधिवेशन पनि विद्यालय शिक्षा विधेयक नल्याई अन्त्य गरेपछि थप चिढिएको छ । महासंघले देशभरका शिक्षकलाई आन्दोलनमा आउन आह्वान गरेको छ ।
आन्दोलनको पहिलो दिन आज माइतीघरमा दिउँसो १ बजे भेला भएर नयाँ बानेश्वर सम्म विरोध प्रदर्शन कार्यक्रम गर्ने महासंघका अध्यक्ष लक्ष्मीकिशोर सुवेदीले जानकारी दिएका छन् ।
बिहीबारदेखि भने हरेक दिन बिहान ११ बजेदेखि दिउँसो ४ बजेसम्म आन्दोलनका कार्यक्रम हुनेछ । महासंघका अध्यक्ष सुवेदीका अनुसार आन्दोलन परिचालन व्यवस्थित बनाउन अहिले ८ बजे बुद्धनगरमा जिल्ला आन्दोलन परिचालन समिति र प्रदेश आन्दोलन परिचालन समितिको बैठक बस्दैछ ।
महासंघ र सरकारबीच विगतमा भएका सबै सहमति सम्बोधन हुने गरी विद्यालय शिक्षा ऐन जारी हुनेपर्ने माग छ ।
