नारायण जोशी 
गोर्खा मिडिया प्रालिमा म्यानेजिङ डाइरेक्टरको भूमिकामा रही काम गरेका राष्ट्रिय स्वतन्त्र पार्टी (रास्वपा)का सभापति रवि लामिछानेमाथि सहकारी अनियमितताको आरोप लागेसँगै पार्टीको हविगत के हुने भन्ने राजनीतिक वृत्तमा चर्चा थियो ।
कतिपयले लामिछानेको अनुपस्थितिमा पार्टी धरासायी हुने खालका अनुमान गरेका थिए । लामिछानेलाई घेराबन्दी गरेर नयाँ उदाएका राजनीतिक दलहरुलाई सकेसम्म फुटाउने, टुटाउने धाउन्नेमा पूराना राजनीतिक दलहरु लागेको आरोप पनि लाग्दै आएको छ । केही समय अघि मात्रै प्रधानमन्त्री केपी शर्मा ओलीले राजनीतिक दल विभाजनसम्बन्धिको अध्यादेश ल्याउने प्रयत्न गरेका थिए, कांग्रेसले नमानेपछि त्यो अध्यादेश रोकिएको छ । यद्यपि जसरी हुन्छ दल विभाजन सम्बन्धि अध्यादेशको धाउन्नेमा प्रधानमन्त्री ओली छन् भन्ने चर्चा हुन्छ । जसमा नेकपा एकीकृत समाजवादी पनि टुटको संहारमा देखिन्छ ।
आमचासोको विषय के छ भने रास्वपा कसरी अगाडि बढ्छ ? रास्वपाको नेतृत्व कसले गर्छ ? यी धेरै प्रश्नका बीचबाट अहिलेको पार्टीको नेतृत्वलाई उपसभापति डीपी अर्यालले अगाडि बढाइरहेका छन् । विशेषगरी रवि लामिछानेसँग नजिक रहेर लामो समय काम गरेका अर्यालले उनको पक्राउपछि पार्टीलाई गति दिँदै गएका छन् । लामिछाने पक्राउ परेपछि पनि रास्वपाको सभापति लामिछाने नै हुन् र उनले नभनेसम्म नेतृत्व परिवर्तन हुनै नसक्ने डीपीको अभिव्यक्ति थियो । उनै डीपीलाई पछिल्लो संक्रमणकालीन अवस्थामा पार्टी जोगाएर जाने चुनौति थपिएको छ । यसलाई उनले भने अवसरको रुपमा लिएको बताएका छन् ।
‘पार्टीमाथि चौतर्फी प्रहार भइरहेका बेला जोगाएर जाने र सबै नेता, कार्यकर्ताहरुलाई मिलाएर लैजाने अहिलेको प्रमुख कार्य हो, यसमा पार्टीका जिम्मेवार साथीहरुले काम गरिरहनुभएको छ, उनले भने ।’
रास्वपाले अहिले संगठन बिस्तारलाई समेत तीब्र बनाउँदै लगेको छ । अर्यालका अनुसार सभापति लामिछानेमाथि भएको राजनीतिक प्रतिशोधको बारेमा बुझाउने र आफ्ना नेताहरुमाथि भइरहेका प्रहारबारे आमजनतासँग गएर जागरण अभियानको थालनी भएको छ । आन्तरिक रुपमा रास्वपाले आफ्नो संगठनलाई मजबुद बनाउँदै आगामी निर्वाचनसम्ममा ठूलो दलका रुपमा उदाउने लक्ष्य राखेको छ ।
‘सभापतिको अनुपस्थितिलाई ध्यानमा राखी पार्टीका गतिविधिहरु नियमित सञ्चालन भइरहेका छन्, जनताले पनि नयाँ साथ र शक्तिको अपेक्षा गरेकाले हामीलाई थप हौसला मिलेको छ, अर्यालले भने ।’
