स्पेस समाचार 
काठमाडौं । पूर्वराज्यमन्त्री रामचन्द्र रायको हत्या प्रकरण अनुसन्धानमा प्रहरीको केन्द्रीय अनुसन्धान ब्यूरो (सीआईबी) को टोली खटिएको छ ।
आइतबार राति आफ्नै घरमा हत्या गरिएका रायको अनुसन्धानका लागि सीआईबीले टोली घटनास्थल पठाएको हो ।
सीआईबीका प्रमुख तथा एआईजी श्यामलाल ज्ञवालीले इन्सपेक्टरको कमान्डमा दुई जनाको टोली सर्लाही पठाइएको जानकारी दिएका छन् ।
सीआईबीको टोलीले टेक्निकल तथा प्राविधिक पाटोको अनुसन्धान र विश्लेषण गर्नेछ । पूर्वराज्यमन्त्री रायको हत्या भएको जानकारी पाउनसाथ प्रहरी चौकी मोहनापुर, इलाका प्रहरी कार्यालय केशरगञ्ज, जिल्ला प्रहरी कार्यालय सर्लाही र मधेश प्रदेश कार्यालयको टोली खटिएको थियो ।
अहिले यो घटनालाई तीन वटा युनिटले अनुसन्धान सुरु गरेका छन् । जिल्ला प्रहरी कार्यालयको टोली, प्रदेशको टोली र सीआईबीको टोलीबाट घटनाको अनुसन्धान भइरहेकोे छ ।
तालिम प्राप्त कुकुरको सहायताले यसअघि हत्यामा प्रयोग भएको हतियार बरामद गर्नुबाहेक प्रहरीले ठूलो उपलब्धि हासिल गर्न सकेको छैन । रायको घरबाट उत्तर–पश्चिमतर्फको करिब ५० मिटर टाढाको बाँस झाङबाट रगत लतपतिएको घरेलु हतियार बरामद भएको थियो ।
रायकै घरमा उनको सहयोगीको रुपमा बसेका २१ वर्षीय राम उदेन रायलाई नियन्त्रणमा लिएर प्रहरीले अनुसन्धान अघि बढाइरहेको छ । आइतबार राति साढे ९ बजेतिर ३ जनाको समूह जग्गा विवाद मिलाइदिन भन्दै आएको उनले प्रहरी समक्ष बताएका छन् । ३ जना समेत रायकै घरमा सुत्ने बताएपछि आफू छतमा गएर सुतेको र घटनाबारे केही पनि जानकारी नभएको उनको भनाइ छ ।
रायको टाउकोमा धारिलो हतियार प्रहार गरेर हत्या भएको प्रहरीले जनाएको छ । उनको शव पोष्टमार्टमका लागि प्रादेशिक अस्पताल मलंगवामा राखिएको छ । राय राष्ट्रिय प्रजातन्त्र पार्टी राप्रपाबाट ३० वर्षअघि भूमि व्यवस्था राज्यमन्त्री बनेका थिए ।
