स्पेस समाचार 
काठमाडौँ–काठमाडौँ महानगरपालिकाका प्रमुख बालेन्द्र शाह (बालेन) सँग नेपालका लागि श्रीलङ्काका राजदूत एअर चिफ मार्सल सुदर्शन पाथिरानाले शिष्टाचार भेट गरेका छन् । भेटका लागि राजदूत पाथिराना बुधवार प्रमुखको कार्य कक्षमा आएका थिए ।
भेटका क्रममा आपसी सम्बन्धलाई औपचारिकता दिन काठमाडौँ र कोलम्बो बिच भगिनी सम्बन्धको सम्भावना, बौद्ध इतिहासमा लुम्बिनी र काठमाडौंको महत्वसँग श्रीलङ्काको सम्बन्ध, बौद्ध तीर्थयात्रा मार्ग, स्वास्थ्य र शिक्षामा आपसी सिकाइ लगायत विषयमा कुराकानी भएको थियो ।
यस क्रममा प्रमुख शाहले, सांस्कृतिक पर्यटनबाट देश–देश र नगर–नगर बिचको सम्बन्धबाट नागरिक तहमा लाभ पुग्ने धारणा राखे । ‘दुई देश बिच मैत्री क्रिकेट खेल आयोजना गर्न सकिन्छ । कला, खेल तथा गीत सङ्गीत क्षेत्रका व्यक्तिहरूका बिचमा ज्ञान सिप आदान प्रदान गर्न सकिन्छ । मानव संसाधन विकास देखि पूर्वाधार विकाससम्मका क्षेत्रमा सहकार्य सम्भव छ ।’
प्रमुख शाहले कोलम्बोबाट भैरहवा विमानस्थलमा अन्तर्राष्ट्रिय विमान सञ्चालन गरेर श्रीलङ्कालाई सिधा लुम्बिनीसँग जोड्न सकिने बताए । त्यस क्रममा उनले श्रीलङ्काको स्वास्थ्य र शिक्षा क्षेत्रका सेवा तथा कार्यक्रम, कृषि उत्पादनको चक्रका बारेमा जिज्ञासा राखेका थिए ।
भेटका क्रममा राजदूत पाथिरानाले, महानगरपालिकाले गएको वैशाख÷ज्येष्ठ महिनामा आयोजना गरेको सिप मेलाको प्रशंसा गर्दै भने, ‘नागरिक सहभागितामा काम गर्ने प्रमुख शाहको कार्य शैलीको म प्रशंसक हुँ ।’
बुद्ध कालदेखि नेपाल र श्रीलङ्का बिच सम्बन्ध रहेको बताउँदै राजदूत पाथिरानाले दुई देश विच साहसिक पर्यटनको पनि उत्तिकै सम्भावना रहेको उल्लेख गरे । कुराकानीका क्रममा हिमालदेखि समुद्री तटसम्मको सम्बन्ध स्थापना गरेर आपसी ज्ञान र हित प्रवर्धनमा जोड दिइएको थियो ।
भेटमा आपसी सद्भाव प्रतीकका लागि मायाको चिनो आदान प्रदान गरिएको थियो । यस क्रममा प्रमुख शाहले बुद्धको प्रतिमा प्रदान गरेका थिए । यस्तै राजदूत पाथिरानाले, श्रीलङ्काको प्रसिद्ध चिया प्रदान गरेका थिए ।
भेटका क्रममा सहरी योजना आयोगका उपाध्यक्ष डा। सुमन नरसिंह राज भण्डारी, अन्तर्राष्ट्रिय सम्बन्ध सल्लाहकार सन्तोष गिरी, अन्तर्राष्ट्रिय सम्बन्ध सचिवालयबाट कोपिला खतिवडासहित अधिकारीहरू सहभागी भएका थिए ।
